ജറുസലേം: ഇസ്രയേൽ പാർലമെന്റ് തിരഞ്ഞെടുപ്പിൽ അറബ് പാർട്ടികൾ ശക്തമായ മുന്നേറ്റം നടത്തുന്നതിനിടെ, റാം പാർട്ടി (അറബ് ലിസ്റ്റ്) പ്രവർത്തകരെ അറസ്റ്റ് ചെയ്ത് പോലീസ്. വോട്ടർമാരെ പണം നൽകി സ്വാധീനിക്കാനും തിരഞ്ഞെടുപ്പ് പ്രക്രിയ അട്ടിമറിക്കാനും ശ്രമിച്ചെന്ന ആരോപണത്തെത്തുടർന്ന് നാല് റാം പാർട്ടി പ്രവർത്തകരെ കസ്റ്റഡിയിലെടുത്തതായി ടൈംസ് ഓഫ് ഇസ്രയേൽ റിപ്പോർട്ട് ചെയ്തു. ഇസ്രയേലി രാഷ്ട്രീയത്തിൽ അറബ് വോട്ടർമാരുടെ നിർണ്ണായക സ്വാധീനം വ്യക്തമാക്കുന്ന തിരഞ്ഞെടുപ്പ് ഫലങ്ങൾ പുറത്തുവരുന്നതിനിടയിലാണ് പോലീസിന്റെ ഈ അടിയന്തര നടപടി.
ചില വോട്ടിങ് കേന്ദ്രങ്ങൾ കേന്ദ്രീകരിച്ച് വോട്ടർമാർക്ക് പണവും മറ്റ് ആനുകൂല്യങ്ങളും വാഗ്ദാനം ചെയ്ത് പാർട്ടിക്ക് അനുകൂലമായി വോട്ട് ചെയ്യിക്കാൻ ശ്രമിച്ചുവെന്നാണ് പോലീസ് ആരോപിക്കുന്നത്. അതിനിടെ, തിരഞ്ഞെടുപ്പ് ക്രമക്കേടുകൾക്ക് പിന്നിൽ ഖത്തർ പണമിടപാടുകൾക്ക് പങ്കുണ്ടെന്ന് സംശയിക്കുന്നതായും, അറബ് പാർട്ടി തലവന്മാരെ അറസ്റ്റ് ചെയ്യാൻ ഇസ്രയേലിന്റെ സുരക്ഷാ ഏജൻസിയായ ‘ഷിൻ ബെറ്റി’നോട് ഉത്തരവിടണമെന്നും ആഭ്യന്തര സുരക്ഷാ മന്ത്രി ഇറ്റാമർ ബെൻ ഗ്വിർ എക്സിൽ കുറിച്ചു. കസ്റ്റഡിയിലുള്ള നാല് പേരെയും വിശദമായി ചോദ്യം ചെയ്തുവരികയാണെന്നും സംഭവത്തിൽ കൂടുതൽ അന്വേഷണം നടക്കുകയാണെന്നും പോലീസ് വൃത്തങ്ങൾ അറിയിച്ചു.
അറബ് ഇസ്രയേലി പൗരന്മാരെ പ്രതിനിധീകരിക്കുന്ന രാഷ്ട്രീയ പാർട്ടികളെ സംബന്ധിച്ചിടത്തോളം നിലനിൽപ്പിന്റെ കൂടി പ്രശ്നമായ നിർണ്ണായക തിരഞ്ഞെടുപ്പാണിത്. റെക്കോർഡ് പോളിങ് രേഖപ്പെടുത്തിയ വോട്ടെടുപ്പിന്റെ പ്രാഥമിക കണക്കുകൾ പ്രകാരം പ്രധാന അറബ് പാർട്ടികളുടെ സഖ്യം 19 സീറ്റുകൾ വരെ നേടിയേക്കുമെന്നാണ് സൂചനകൾ നൽകുന്നത്.
