തിരുവനന്തപുരം: വയനാട്ടിലെ ദുരന്തബാധിതരെ സഹായിക്കാന് മുഖ്യമന്ത്രിയുടെ ദുരിതാശ്വാസനിധിയിലേക്ക് സംഭാവനകൾ നൽകി പ്രമുഖർ രംഗത്ത് വന്നു. സഹായഹസ്തങ്ങളുമായി എല്ലാ മേഖലയില് നിന്നും സുമനസ്സുകള് ഇതിനോടകം മുന്നോട്ടു വന്നതായി മുഖ്യമന്ത്രി പിണറായി വിജയന് അറിയിച്ചു. മുഖ്യമന്ത്രിയുടെ ദുരിതാശ്വാസ നിധിയിലേക്ക് ലുലു ഗ്രൂപ്പ് ചെയര്മാന് എം.എ.യൂസഫലി, കല്യാണ് ജ്വല്ലേഴ്സ് ഉടമ കല്യാണ രാമന്, പ്രമുഖ വ്യവസായി രവി പിള്ള എന്നിവര് 5 കോടി രൂപ വീതം ധനസഹായം പ്രഖ്യാപിച്ചിട്ടുണ്ട്.
വിഴിഞ്ഞം പോര്ട്ട് അദാനി ഗ്രൂപ്പും അഞ്ച് കോടി രൂപ സഹായ വാഗ്ദാനം നല്കി. കൂടാതെ, കെഎസ്എഫ്ഇ അഞ്ചു കോടി രൂപയും, കാനറാ ബാങ്ക് ഒരുകോടി രൂപയും കെഎംഎംഎല് 50 ലക്ഷം രൂപയും വനിത വികസന കോര്പറേഷന് 30 ലക്ഷം രൂപയും, ഔഷധി ചെയര്പേഴ്സണ് ശോഭന ജോര്ജ് 10 ലക്ഷം രൂപയും നല്കി.
തമിഴ്നാട് മുഖ്യമന്ത്രി എം.കെ.സ്റ്റാലിൻ പ്രഖ്യാപിച്ച 5 കോടി രൂപ തമിഴ്നാട് പൊതുമരാമത്ത് മന്ത്രി ഇ.വി.വേലു ഓഫിസില് എത്തി കൈമാറിയതായി മുഖ്യമന്ത്രി പറഞ്ഞു. തമിഴ് ചലച്ചിത്ര നടന് വിക്രം 20 ലക്ഷം കൈമാറി. ടിബറ്റന് ആത്മീയ നേതാവ് ദലൈലാമ ട്രസ്റ്റ് 11 ലക്ഷം രൂപ സംഭാവന പ്രഖ്യാപിച്ചു. എല്ലാ മന്ത്രിമാരും ഒരു മാസത്തെ ശമ്പളം ദുരിതാശ്വാസനിധിയിലേക്ക് സംഭാവന നൽകാൻ തീരുമാനിച്ചിട്ടുണ്ടെന്നും മുഖ്യമന്ത്രി പറഞ്ഞു.
