കാസറഗോഡ് : ജില്ലയിൽ പെയ്യുന്ന കനത്ത മഴയെത്തുടർന്ന് മതിലിടിഞ്ഞുവീണ് രണ്ട് കുട്ടികൾ ദാരുണമായി മരണപ്പെട്ടു. അബൂബക്കറിന്റെ മക്കളായ മുൻസീർ (10), മുസമ്മിൽ (14) എന്നിവരാണ് മരിച്ചത്. അപകടത്തിൽ വിഹീഷ് എന്ന മറ്റൊരു കുട്ടിക്ക് ഗുരുതരമായി പരിക്കേറ്റിട്ടുണ്ട്. ശനിയാഴ്ച വൈകീട്ട് 4.45 ഓടെയായിരുന്നു നാടിനെ നടുക്കിയ ഈ ദാരുണ സംഭവം നടന്നത്. അവധിക്കാലത്ത് കുട്ടികൾ സാധാരണയായി ചെയ്യാറുള്ളതുപോലെ മൂവരും ചേർന്ന് ഒരു താല്ക്കാലിക കട നടത്തിവരികയായിരുന്നു. ഇതിനിടയിലാണ് അപകടം സംഭവിച്ചത്.
വിഹീഷിന്റെ വീടിന് സമീപത്തുള്ള മതിലാണ് കനത്ത മഴയിൽ ഇടിഞ്ഞുവീണതെന്നാണ് പ്രാഥമികമായി ലഭിക്കുന്ന വിവരം. മതിലിനടിയിൽപ്പെട്ട മൂന്നുപേരെയും ഉടൻതന്നെ നാട്ടുകാർ ചേർന്ന് ആശുപത്രിയിൽ എത്തിച്ചെങ്കിലും മുൻസീറിനെയും മുസമ്മിലിനെയും രക്ഷിക്കാൻ സാധിച്ചില്ല. പരിക്കേറ്റ വിഹീഷ് നിലവിൽ മുള്ളേരിയിലുള്ള കോപ്പറേറ്റ് ആശുപത്രിയിൽ തീവ്രചികിത്സയിലാണ്. തൊട്ടടുത്ത വീടുകളിൽ താമസിക്കുന്ന കുട്ടികളായിരുന്നു ഇവർ മൂവരും. കാസറഗോഡ് ജില്ലയിൽ ഇന്ന് റെഡ് അലേർട്ട് പ്രഖ്യാപിച്ചിരുന്ന സാഹചര്യമായിരുന്നു നിലവിലുണ്ടായിരുന്നത്. രാവിലെ 11 മണി മുതൽ ജില്ലയുടെ പലയിടങ്ങളിലും കനത്ത രീതിയിൽ ഇടവിട്ടുള്ള മഴയാണ് ലഭിച്ചുകൊണ്ടിരിക്കുന്നത്.
