തിരുവനന്തപുരം: പ്രവാസി ക്ഷേമനിധി ബോർഡ് വഴി വിതരണം ചെയ്യുന്ന പെൻഷൻ ആനുകൂല്യങ്ങൾക്കായി 32 കോടി രൂപ അനുവദിച്ചതായി ഭക്ഷ്യ, പൊതുവിതരണ വകുപ്പ് മന്ത്രിയും സർക്കാരും അറിയിച്ചു. ധനവകുപ്പ് തുക ലഭ്യമാക്കിയതോടെ ഓണത്തിന് മുന്നോടിയായി പെൻഷൻ തുക പ്രവാസികളുടെ ബാങ്ക് അക്കൗണ്ടുകളിലേക്ക് നേരിട്ടെത്തും.
കഴിഞ്ഞ സർക്കാറിന്റെ കാലത്ത് പ്രവാസി ക്ഷേമനിധി ബോർഡിന്റെ പെൻഷൻ ഫണ്ട് വകമാറ്റി ചെലവഴിച്ചതിനെ തുടർന്നുണ്ടായ രൂക്ഷമായ സാമ്പത്തിക പ്രതിസന്ധിയാണ് പെൻഷൻ വിതരണത്തിൽ വലിയ കുടിശ്ശിക വരുത്തിവെച്ചത്. പ്രതിമാസം 35 കോടി രൂപ വീതം നിലവിൽ ഏകദേശം 105 കോടിയിലധികം രൂപയുടെ കുടിശ്ശികയാണ് സർക്കാറിനുള്ളത്. 2026 മേയ് മുതലുള്ള പെൻഷനാണ് മുടങ്ങിയിരുന്നത്. നാലും അഞ്ചും മാസങ്ങളിലെ അരിയർ തുക ലഭിക്കാനുള്ള പുതിയ പെൻഷൻകാരെയും ഇത് പ്രതിസന്ധിയിലാക്കിയിരുന്നു. വിഷയത്തിൽ അടിയന്തരമായി ഇടപെട്ട നിലവിലെ സർക്കാർ ആദ്യഘട്ട തുക അനുവദിക്കുകയും, ബാക്കി കുടിശ്ശിക നടപടികൾ വേഗത്തിലാക്കാൻ മുഖ്യമന്ത്രി നിർദേശം നൽകുകയും ചെയ്തു.
2009-ൽ ആരംഭിച്ച പ്രവാസി ക്ഷേമനിധി ബോർഡിൽ നിലവിൽ 9.5 ലക്ഷത്തോളം അംഗങ്ങളും 94,000-ത്തിലേറെ പെൻഷൻകാരുമാണുള്ളത്. മരുന്നിനും നിത്യച്ചെലവുകൾക്കും പെൻഷൻ തുകയെ മാത്രം ആശ്രയിക്കുന്ന പ്രവാസികൾക്ക് ഇത് വലിയ ആശ്വാസമാകും. പദ്ധതിയിൽ നിലനിൽക്കുന്ന പ്രതിസന്ധികൾക്ക് പുറമേ, അംഗങ്ങൾക്ക് ഓൺലൈൻ വഴി കുടിശ്ശിക അടയ്ക്കാനുള്ള സംവിധാനം മുന്നറിയിപ്പില്ലാതെ നിർത്തിവെച്ചതും 60 വയസ്സ് കഴിഞ്ഞവർക്ക് അംഗത്വം പുതുക്കാൻ സാധിക്കാത്തതും ബോർഡിന്റെ ശ്രദ്ധയിൽപ്പെട്ടിട്ടുണ്ട്.
