തിരുവനന്തപുരം: സി.എം.ആർ.എൽ–എക്സാലോജിക് സാമ്പത്തിക ഇടപാട് കേസിൽ മുൻ മുഖ്യമന്ത്രി പിണറായി വിജയനെതിരെ അഴിമതി നിരോധന നിയമപ്രകാരം കേസെടുക്കണമെന്ന് ആവശ്യപ്പെട്ട് എൻഫോഴ്സ്മെന്റ് ഡയറക്ടറേറ്റ് (ഇ.ഡി) സംസ്ഥാന വിജിലൻസ് ആൻഡ് ആന്റി കറപ്ഷൻ ബ്യൂറോ (വി.എ.സി.ബി) തലവനായ പോലീസ് ഡയറക്ടർ ജനറലിന് (ഡി.ജി.പി) കത്തയച്ചു. പിണറായി വിജയന് പുറമെ മകൾ ടി. വീണ, മുൻ മന്ത്രി മുഹമ്മദ് റിയാസ് എന്നിവർക്കെതിരെയും കേസ് രജിസ്റ്റർ ചെയ്ത് എഫ്.ഐ.ആർ ഇടണമെന്ന് കത്തിൽ ആവശ്യപ്പെട്ടിട്ടുണ്ട്.
കരിമണൽ കമ്പനിയായ സി.എം.ആർ.എൽ വഴി മകൾ ടി. വീണയുടെ ഉടമസ്ഥതയിലുള്ള എക്സാലോജിക് കമ്പനിക്ക് സേവനങ്ങളൊന്നും നൽകാതെ 3.28 കോടി രൂപ കൈമാറിയത് കൈക്കൂലിയാണെന്നാണ് ഇ.ഡിയുടെ ആരോപണം. പിണറായി വിജയനുമായുള്ള വ്യക്തിബന്ധത്തിന്റെ പേരിലാണ് ഈ തുക നൽകിയതെന്ന സി.എം.ആർ.എൽ മാനേജിങ് ഡയറക്ടറുടെ മൊഴിയുടെ അടിസ്ഥാനത്തിലാണ് അന്വേഷണം പിണറായി വിജയനിലേക്ക് നീളുന്നത്.
കള്ളപ്പണം വെളുപ്പിക്കൽ തടയൽ നിയമത്തിലെ (PMLA) 66(2) വകുപ്പ് പ്രകാരമാണ് അന്വേഷണത്തിനിടയിൽ ലഭിച്ച അഴിമതി സംബന്ധിച്ച വിവരങ്ങൾ ഇ.ഡി സംസ്ഥാന വിജിലൻസിന് കൈമാറുന്നത്. വിഷയത്തിൽ സംസ്ഥാന സർക്കാർ എടുക്കുന്ന തീരുമാനം കേസിൽ നിർണായകമാകും. അതേസമയം, തങ്ങൾക്കെതിരെയുള്ള ആരോപണങ്ങൾ രാഷ്ട്രീയപ്രേരിതമാണെന്നാണ് സി.പി.ഐ.എം നിലപാട്.
