ബീജിങ്: ചൈനയിലെ കിഴക്കൻ തീരത്തുള്ള കിങ്ദാവോ ബേഹായ് കപ്പൽശാലയിലുണ്ടായ കടുത്ത തീപിടിത്തത്തിൽ 25 പേർ മരിച്ചു. അറ്റകുറ്റപ്പണികൾ നടക്കുകയായിരുന്ന ‘ഓഷ്യൻ മെലഡി’ എന്ന ചരക്ക് കപ്പലിലാണ് പ്രാദേശിക സമയം രാവിലെ 11:15-ഓടെ ദാരുണമായ ദുരന്തമുണ്ടായത്. കപ്പൽശാലയുടെ മേൽനോട്ട ചുമതലയുള്ള ചൈന സ്റ്റേറ്റ് ഷിപ്പ് ബിൽഡിങ് കോർപ്പറേഷനാണ് (സി.എസ്.എസ്.സി) അപകടവിവരം പുറത്തുവിട്ടത്.
അപകടസമയത്ത് കപ്പലിനുള്ളിൽ ആകെ 42 പേരാണ് ഉണ്ടായിരുന്നത്. ഇതിൽ 12 പേർ സുരക്ഷിതമായി പുറത്തുകടന്നപ്പോൾ പരിക്കേറ്റ അഞ്ചുപേരെ സമീപത്തെ ആശുപത്രിയിൽ പ്രവേശിപ്പിച്ചു. ഇവരുടെ ആരോഗ്യനില നിലവിൽ തൃപ്തികരമാണെന്ന് അധികൃതർ വ്യക്തമാക്കി. അപകടത്തെ തുടർന്ന് കാണാതായ 25 പേരുടെയും മൃതദേഹങ്ങൾ പിന്നീട് രക്ഷാപ്രവർത്തകർ കണ്ടെത്തുകയായിരുന്നു. പ്രാദേശിക സമയം ഉച്ചയ്ക്ക് 2:30-ഓടെയാണ് ഫയർഫോഴ്സ് തീ പൂർണ്ണമായും നിയന്ത്രണവിധേയമാക്കിയത്.
ദുരന്തത്തിൽ ചൈനീസ് പ്രസിഡന്റ് ഷി ജിൻപിങ് ആഴത്തിലുള്ള ദുഃഖം രേഖപ്പെടുത്തുകയും സംഭവത്തെക്കുറിച്ച് സമഗ്രമായ അന്വേഷണത്തിന് നിർദേശം നൽകുകയും ചെയ്തു. തീപിടിത്തത്തിന്റെ യഥാർത്ഥ കാരണം നിലവിൽ ഔദ്യോഗികമായി വ്യക്തമായിട്ടില്ല. അന്വേഷണത്തിനും തുടർ രക്ഷാപ്രവർത്തനങ്ങൾക്കും മേൽനോട്ടം വഹിക്കുന്നതിനായി ചൈനീസ് എമർജൻസി മാനേജ്മെന്റ് മന്ത്രാലയം പ്രത്യേക ഉന്നതതല സംഘത്തെ സംഭവസ്ഥലത്തേക്ക് നിയോഗിച്ചിട്ടുണ്ട്.
