ടെഹ്റാൻ: ബ്രിട്ടന്റെ റോയൽ നേവിയെയും റോയൽ എയർഫോഴ്സിനെയും ഭീകര സംഘടനകളായി പ്രഖ്യാപിച്ച് ഇറാൻ. ഇതിനുപുറമെ, ബ്രിട്ടീഷ് രഹസ്യാന്വേഷണ ഏജൻസിയായ എം.ഐ 6-നെ (MI6) ‘ശത്രുസംഘടന’കളുടെ പട്ടികയിലും ഉൾപ്പെടുത്തിയിട്ടുണ്ട്. ഇറാൻ വിദേശകാര്യ മന്ത്രാലയമാണ് സുപ്രീം നാഷണൽ സെക്യൂരിറ്റി കൗൺസിലിന്റെ നിർദേശപ്രകാരമുള്ള ഈ നിർണായക തീരുമാനങ്ങൾ ഔദ്യോഗികമായി പുറപ്പെടുവിച്ചത്.
ബ്രിട്ടനിലെ ആർ.എ.എഫ് ഫെയർഫോർഡ് വ്യോമസേനാ താവളത്തിലുണ്ടായ സുരക്ഷാ വീഴ്ചയ്ക്ക് പിന്നിൽ ഇറാന് പങ്കുണ്ടെന്ന് ബ്രിട്ടീഷ് പ്രധാനമന്ത്രി ആൻഡി ബേർണാം ആരോപിച്ചതിന് തൊട്ടുപിന്നാലെയാണ് ഇറാന്റെ ഈ പ്രതികാര നടപടി. ഇംഗ്ലണ്ടിലെ വ്യോമസേനാ താവളത്തിന് സമീപം സംശയാസ്പദമായ സാഹചര്യത്തിൽ ആളുകൾ പിടിയിലായ സംഭവത്തെ തുടർന്ന്, അവിടെ തങ്ങിയിരുന്ന യു.എസ് ബോംബർ വിമാനങ്ങൾ പിൻവലിക്കേണ്ടി വന്നിരുന്നു. ഈ സംഭവം ഇറാൻ ആസൂത്രണം ചെയ്തതാണെന്ന ബ്രിട്ടന്റെ വാദം വ്യാജമാണെന്ന് തെഹ്റാൻ നേരത്തെ തിരിച്ചടിച്ചിരുന്നു.
കഴിഞ്ഞ ഒരു വർഷമായി ബ്രിട്ടന്റെ ഭാഗത്തുനിന്നുണ്ടാകുന്ന ശത്രുതാപരമായ നിലപാടുകളാണ് ഈ കടുത്ത തീരുമാനത്തിന് വഴിവെച്ചതെന്ന് ഇറാൻ വിദേശകാര്യ മന്ത്രാലയം വ്യക്തമാക്കി. യുദ്ധസാഹചര്യങ്ങളിൽ ബ്രിട്ടീഷ് മണ്ണിലെ സൈനിക-ലോജിസ്റ്റിക് സൗകര്യങ്ങൾ ഉപയോഗിക്കാൻ യു.എസ് സേനയ്ക്ക് അനുമതി നൽകിയതും, കഴിഞ്ഞ ജൂലൈയിൽ ഇറാന്റെ ഇസ്ലാമിക് റെവല്യൂഷനറി ഗാർഡ് കോർപ്സിനെ (IRGC) ബ്രിട്ടൻ ‘സ്റ്റേറ്റ് ത്രെറ്റ്‌സ് ആക്ട്’ പ്രകാരം നിരോധിച്ചതും ഇതിന് കാരണമായി ഇറാൻ ചൂണ്ടിക്കാട്ടുന്നു. ചാരവൃത്തി തടയുന്നതിനുള്ള ഇറാനിയൻ നിയമപ്രകാരമായിരിക്കും എം.ഐ 6-നെതിരെ തുടർനടപടികൾ സ്വീകരിക്കുകയെന്നും ഉത്തരവിന്റെ പ്രത്യാഘാതങ്ങൾക്ക് ബ്രിട്ടീഷ് സർക്കാർ ഉത്തരവാദികളായിരിക്കുമെന്നും വിദേശകാര്യ മന്ത്രാലയം മുന്നറിയിപ്പ് നൽകി.
