കോഴിക്കോട്: വരാനിരിക്കുന്ന നിയമസഭാ തിരഞ്ഞെടുപ്പിനുള്ള യു.ഡി.എഫ് സ്ഥാനാർത്ഥിപ്പട്ടിക അടുത്ത 48 മണിക്കൂറിനുള്ളിൽ പൂർത്തിയാകുമെന്ന് മുതിർന്ന കോൺഗ്രസ് നേതാവ് കെ. മുരളീധരൻ അറിയിച്ചു. സംസ്ഥാനത്തെ 140 മണ്ഡലങ്ങളിലും യു.ഡി.എഫിന് ശക്തരായ സ്ഥാനാർത്ഥികളുണ്ടാകുമെന്നും നിലവിൽ അതീവ ശുഭപ്രതീക്ഷയുള്ള രാഷ്ട്രീയ സാഹചര്യമാണ് നിലനിൽക്കുന്നതെന്നും അദ്ദേഹം കോഴിക്കോട്ട് മാധ്യമങ്ങളോട് പറഞ്ഞു.
പ്രതിപക്ഷ നേതാവും ദേശീയ നേതാക്കളും സൂചിപ്പിച്ചതുപോലെ സ്ഥാനാർത്ഥി നിർണ്ണയ ചർച്ചകൾ അവസാന ഘട്ടത്തിലാണ്. മണ്ഡലങ്ങളിൽ ഏകകണ്ഠമായ തീരുമാനത്തിലേക്ക് എത്താനാണ് പാർട്ടി ശ്രമിക്കുന്നത്. നേരത്തെ തന്നെ ചില സുപ്രധാന മണ്ഡലങ്ങളിൽ സ്ഥാനാർത്ഥികളുടെ കാര്യത്തിൽ ധാരണയായിരുന്നു. കെ. മുരളീധരൻ വട്ടിയൂർക്കാവിലും ടി.എൻ. പ്രതാപൻ മണലൂരിലും വി.ടി. ബൽറാം തൃത്താലയിലും മത്സരിക്കുമെന്നാണ് സൂചനകൾ. സ്ഥാനാർത്ഥി പ്രഖ്യാപനം വൈകില്ലെന്നും യു.ഡി.എഫ് ഐക്യത്തോടെ തിരഞ്ഞെടുപ്പിനെ നേരിടുമെന്നും അദ്ദേഹം കൂട്ടിച്ചേർത്തു.
