തിരുവനന്തപുരം: സംസ്ഥാനത്ത് ഐ.എ.എസ് തലപ്പത്ത് വൻ അഴിച്ചുപണി നടത്തി സർക്കാർ. കെ.എസ്.ഇ.ബി ചെയർമാൻ ആൻഡ് മാനേജിങ് ഡയറക്ടറായി എൻ. പ്രശാന്തിനെ നിയമിച്ചു. എം.ജി. രാജമാണിക്യത്തെ മാറ്റിയാണ് എൻ. പ്രശാന്തിനെ പുതിയ ചുമതലയേൽപ്പിച്ചത്. വകുപ്പുകളുടെ പ്രവർത്തനം കൂടുതൽ ഊർജ്ജിതമാക്കുന്നതിന്റെ ഭാഗമായാണ് ഉന്നതതല പുനഃസംഘടന.
ആരോഗ്യവകുപ്പ് പ്രിൻസിപ്പൽ സെക്രട്ടറി സ്ഥാനത്തുനിന്ന് ഷർമിള മേരി ജോസഫിനെ മാറ്റി പകരം എ. മുഹമ്മദ് ഹനീഷിന് ആരോഗ്യവകുപ്പിന്റെ ചുമതല നൽകി. പകരം ഷർമിള മേരി ജോസഫിന് ഗതാഗതവകുപ്പിന്റെ പ്രധാന ചുമതലയാണ് നൽകിയിരിക്കുന്നത്. മുതിർന്ന ഐ.എ.എസ് ഉദ്യോഗസ്ഥനായ കെ.ആർ. ജ്യോതിലാലിനെ ആഭ്യന്തര വകുപ്പിലേക്ക് മാറ്റി നിയമിച്ചപ്പോൾ, മിൻഹാജ് ആലം ധനകാര്യവകുപ്പ് അഡീഷണൽ ചീഫ് സെക്രട്ടറിയാകും.
മറ്റ് പ്രധാന മാറ്റങ്ങളിൽ, എം. ബീനയെ വ്യവസായ വകുപ്പ് സെക്രട്ടറിയായും പുനീത് കുമാറിനെ ഊർജ്ജ വകുപ്പ് അഡീഷണൽ സെക്രട്ടറിയായും നിയമിച്ചു. അനു കുമാരിയാണ് പുതിയ ടൂറിസം ഡയറക്ടർ. വകുപ്പുകളുടെ ഏകോപനവും ഭരണനിർവ്വഹണവും വേഗത്തിലാക്കുക എന്ന ലക്ഷ്യത്തോടെയാണ് ഭരണനിർവ്വഹണ തലപ്പത്തെ ഈ പ്രധാന മാറ്റങ്ങൾ.
