കണ്ണൂർ: മുൻ ആരോഗ്യമന്ത്രി വീണാ ജോർജിനെ കണ്ണൂർ റെയിൽവേ സ്റ്റേഷനിൽ വെച്ച് ആക്രമിക്കാൻ ശ്രമിച്ചെന്ന കേസിൽ കെ എസ് യു പ്രവർത്തകർക്ക് പ്രത്യേക അന്വേഷണ സംഘത്തിന്റെ (എസ്.ഐ.ടി) ക്ലീൻ ചിറ്റ്. കണ്ണൂരിൽ നടന്നത് സാധാരണ കരിങ്കൊടി പ്രതിഷേധം മാത്രമാണെന്നും പ്രവർത്തകർ മന്ത്രിയെ വധിക്കാൻ ശ്രമിച്ചിട്ടില്ലെന്നും ഡി.ജി.പിക്ക് സമർപ്പിച്ച പുനരന്വേഷണ റിപ്പോർട്ടിൽ എസ്.ഐ.ടി വ്യക്തമാക്കുന്നു. സംഭവത്തെ മുൻമന്ത്രിയും അവരുടെ ഗൺമാനും ചേCarmel പെരുപ്പിച്ചു കാണിക്കുകയായിരുന്നുവെന്നാണ് അന്വേഷണ സംഘത്തിന്റെ പ്രധാന കണ്ടെത്തൽ.
പ്രതിഷേധത്തിനിടെ പൊലീസും കെ എസ് യു പ്രവർത്തകരും തമ്മിലുണ്ടായ ഉന്തും തള്ളത്തിനുമിടയിൽപ്പെട്ടതിനാലാണ് മന്ത്രിക്ക് കഴുത്തുവേദന അനുഭവപ്പെട്ടതെന്നും, അവരുടെ ശരീരത്തിൽ പുറമേ മുറിവുകളോ പരുക്കുകളോ ഇല്ലെന്ന് പരിയാരം മെഡിക്കൽ കോളേജിലെ ഡോക്ടർമാർ മൊഴി നൽകിയിട്ടുണ്ടെന്നും റിപ്പോർട്ടിൽ പറയുന്നു. മന്ത്രിയുടെ കടുത്ത സമ്മർദ്ദത്തിന് വഴങ്ങിയാണ് വധശ്രമം നടന്നതെന്ന രീതിയിൽ ആദ്യമൊഴി നൽകിയതെന്ന് ഗൺമാനും, തന്റെ പേരിൽ വ്യാജമൊഴി എഴുതിച്ചേർക്കുകയായിരുന്നുവെന്ന് സുരക്ഷാച്ചുമതലയുണ്ടായിരുന്ന പോലീസുകാരും എസ്.ഐ.ടിയോട് വെളിപ്പെടുത്തി.
2026 ഫെബ്രുവരിയിലായിരുന്നു കേസിനാസ്പദമായ സംഭവം നടക്കുന്നത്. കെ എസ് യു പ്രവർത്തകർ തനിക്കെതിരെ വധശ്രമം നടത്തിയെന്ന മന്ത്രിയുടെയും ഗൺമാന്റെയും പരാതിയിൽ കെ എസ് യു നേതാക്കൾ രണ്ടാഴ്ചയോളം റിമാൻഡിലായിരുന്നു. കേസ് കോടതിയുടെ പരിഗണനയിലിരിക്കെയാണ് യു.ഡി.എഫ് സർക്കാർ പ്രത്യേക അന്വേഷണസംഘത്തെ നിയോഗിച്ച് പുനരന്വേഷണത്തിന് ഉത്തരവിട്ടത്. എസ്.ഐ.ടിയുടെ പുതിയ റിപ്പോർട്ടും ഗൺമാന്റെ അടക്കം മൊഴിമാറ്റവും പുറത്തുവന്നതോടെ വധശ്രമക്കേസ് കോടതിയിൽ നിലനിൽക്കാത്ത സാഹചര്യമാണ് നിലവിലുള്ളത്.
