ചെന്നൈ: ജാതിവിവേചനത്തിനെതിരെ നിരന്തരം ശബ്ദമുയർത്തുകയും നീതിന്യായ വ്യവസ്ഥയിലെ ഏറ്റുമുട്ടലുകളിലൂടെ വാർത്തകളിൽ ഇടംപിടിക്കുകയും ചെയ്ത മദ്രാസ് ഹൈക്കോടതി മുൻ ജഡ്ജി സി.എസ്. കർണൻ (71) അന്തരിച്ചു. ആരോഗ്യപ്രശ്നങ്ങളെ തുടർന്ന് അടുത്തിടെ ചെന്നൈയിലെ ആശുപത്രിയിൽ പ്രവേശിപ്പിക്കപ്പെട്ട അദ്ദേഹം അവിടെ വെച്ചാണ് അന്ത്യശ്വാസം വലിച്ചത്. കോടതിയലക്ഷ്യക്കേസിൽ തടവുശിക്ഷയ്ക്ക് വിധിക്കപ്പെട്ട രാജ്യത്തെ ആദ്യത്തെ സിറ്റിംഗ് ഹൈക്കോടതി ജഡ്ജിയായിരുന്നു അദ്ദേഹം.
1955-ൽ തമിഴ്‌നാട്ടിലെ കടലൂർ ജില്ലയിലുള്ള കർണതം ഗ്രാമത്തിൽ സ്വാമിനാഥന്റെയും കമലത്തിന്റെയും എട്ട് മക്കളിൽ രണ്ടാമനായാണ് ജനനം. കരുണാനിധി എന്നായിരുന്നു ആദ്യപേര്. 1991-ൽ ഭാര്യ സരസ്വതിയുടെ അഭ്യർത്ഥനപ്രകാരം പേര് കർണൻ എന്നാക്കി മാറ്റുകയായിരുന്നു. 1983-ൽ മദ്രാസ് ലോ കോളേജിൽ നിന്ന് നിയമബിരുദം നേടിയ ശേഷം അഭിഭാഷകനായി പ്രാക്ടീസ് ആരംഭിച്ചു. തുടർന്ന് 2009 മാർച്ചിൽ മദ്രാസ് ഹൈക്കോടതിയിൽ അഡീഷണൽ ജഡ്ജിയായി നിയമിതനായ അദ്ദേഹം 2011 മാർച്ചിൽ സ്ഥിരം ജഡ്ജിയായി.
മദ്രാസ് ഹൈക്കോടതി ജഡ്ജിയായിരിക്കെ 20 സഹജഡ്ജിമാർക്കെതിരെ അഴിമതി ആരോപണമുന്നയിക്കുകയും ഇവർക്കെതിരെ അന്വേഷണം ആവശ്യപ്പെട്ട് പ്രധാനമന്ത്രിയടക്കമുള്ളവർക്ക് കത്തയക്കുകയും ചെയ്തതോടെയാണ് കർണനും സുപ്രീം കോടതിയും തമ്മിലുള്ള ചരിത്രപരമായ ഏറ്റുമുട്ടലുകൾക്ക് തുടക്കമായത്. കോടതിയലക്ഷ്യക്കേസിൽ സുപ്രീം കോടതിയിൽ ഹാജരായ അദ്ദേഹം, തന്നെ അപമാനിച്ചെന്ന് ചൂണ്ടിക്കാട്ടി പട്ടികവിഭാഗങ്ങൾക്കെതിരായ അതിക്രമം തടയുന്ന നിയമപ്രകാരം അന്നത്തെ ചീഫ് ജസ്റ്റിസ് ജെ.എസ്. ഖെഹാർ ഉൾപ്പെടെ ഏഴ് സുപ്രീം കോടതി ജഡ്ജിമാർക്കെതിരെ കേസെടുത്ത് സമൻസ് അയച്ചു. തുടർന്ന് കർണന്റെ മാനസികനില പരിശോധിക്കാൻ സുപ്രീം കോടതി മെഡിക്കൽ സംഘത്തെ അയച്ചെങ്കിലും അദ്ദേഹം പരിശോധനയ്ക്ക് വിസമ്മതിക്കുകയും, പിറ്റേന്ന് സുപ്രീം കോടതി ജഡ്ജിമാർക്കെതിരെ ജാമ്യമില്ലാ വാറന്റ് പുറപ്പെടുവിക്കുകയും ചെയ്തു.
മെയ് എട്ടിന് ചീഫ് ജസ്റ്റിസ് ഖെഹാർ ഉൾപ്പെടെ ഏഴ് സുപ്രീം കോടതി ജഡ്ജിമാർക്ക് അഞ്ച് വർഷം കഠിനതടവ് വിധിച്ചുകൊണ്ട് കർണൻ ഉത്തരവിട്ടതോടെ പോര് എല്ലാ അതിരുകളും ലംഘിച്ചു. ഇതിന് പിന്നാലെ, കൊൽക്കത്തയിൽ നിന്ന് ചെന്നൈയിലേക്കുള്ള വിമാനത്തിൽ കർണൻ യാത്ര ചെയ്യുന്നതിനിടെ സുപ്രീം കോടതി അദ്ദേഹത്തിന് ആറുമാസം തടവുശിക്ഷ വിധിക്കുകയായിരുന്നു. വിധി വന്നതിന് പിന്നാലെ ഒളിവിൽ പോയ അദ്ദേഹം പിന്നീട് കീഴടങ്ങുകയും ജയിൽ ശിക്ഷ അനുഭവിക്കുകയും ചെയ്തു.
