കൽപറ്റ: പുനരധിവാസത്തിന്റെ ഭാഗമായി നിർമ്മിച്ച ടൗൺഷിപ്പിലെ വീടുകളിൽ വിള്ളലുകൾ പ്രത്യക്ഷപ്പെട്ടെന്ന പരാതിയെത്തുടർന്ന് റവന്യൂ മന്ത്രി കെ. രാജൻ നേരിട്ടെത്തി പരിശോധന നടത്തി. വീടുകളുടെ ഭിത്തികളിൽ കാണപ്പെടുന്നത് നിർമ്മാണത്തിലെ ഗുരുതരമായ വിള്ളലുകളല്ലെന്നും പ്ലാസ്റ്ററിംഗിലുണ്ടായ ചെറിയ വ്യത്യാസങ്ങളോ ജോയിന്റുകളിലെ അടയാളങ്ങളോ മാത്രമാണെന്ന് മന്ത്രി പരിശോധനയ്ക്ക് ശേഷം വ്യക്തമാക്കി. ടൗൺഷിപ്പിലെ താമസക്കാരുടെ ആശങ്കകൾ നേരിട്ട് കേട്ട മന്ത്രി, കെട്ടിടങ്ങളുടെ സുരക്ഷ സംബന്ധിച്ച് ഭയപ്പെടേണ്ട സാഹചര്യമില്ലെന്ന് ഉറപ്പുനൽകി.
വിഷയത്തിൽ കൂടുതൽ വ്യക്തത വരുത്തുന്നതിനും ജനങ്ങളുടെ ആശങ്ക പരിഹരിക്കുന്നതിനുമായി വിദഗ്ധ സമിതിയെക്കൊണ്ട് സാങ്കേതിക പരിശോധന നടത്താൻ മന്ത്രി ഉദ്യോഗസ്ഥർക്ക് നിർദ്ദേശം നൽകി. നിർമ്മാണ പ്രവർത്തനങ്ങളിൽ എന്തെങ്കിലും പോരായ്മകൾ കണ്ടെത്തിയാൽ അത് ഉടൻ പരിഹരിക്കുമെന്നും ഗുണഭോക്താക്കൾക്ക് പൂർണ്ണ സുരക്ഷിതമായ താമസസൗകര്യം ഉറപ്പാക്കുകയാണ് സർക്കാരിന്റെ ലക്ഷ്യമെന്നും അദ്ദേഹം കൂട്ടിച്ചേർത്തു. കലക്ടർ ഉൾപ്പെടെയുള്ള ഉന്നത ഉദ്യോഗസ്ഥരും മന്ത്രിക്കൊപ്പം പരിശോധനയിൽ പങ്കെടുത്തു. സാങ്കേതിക റിപ്പോർട്ട് ലഭ്യമാകുന്ന മുറയ്ക്ക് തുടർന്നുള്ള നടപടികൾ സ്വീകരിക്കുമെന്ന് അധികൃതർ അറിയിച്ചു.
