റിയാദ്: ഏഷ്യൻ ഗെയിംസ് ചരിത്രത്തിൽ മെഡൽ സ്വന്തമാക്കുന്ന ആദ്യ സൗദി വനിതാ താരമായി കരാട്ടെ താരം ദീന മുസ്തഫ. ജപ്പാനിലെ നഗോയയിൽ നടക്കുന്ന 20-ാമത് ഏഷ്യൻ ഗെയിംസിൽ വനിതകളുടെ 68 കിലോഗ്രാം വിഭാഗത്തിലാണ് ദീന ചരിത്രപരമായ വെങ്കല മെഡൽ കരസ്ഥമാക്കിയത്. സൗദി പ്രസ് ഏജൻസിയാണ് ഈ നേട്ടം പുറത്തുവിട്ടത്.
വേദിയിൽ ഉജ്ജ്വലമായ തിരിച്ചുവരവ് നടത്തിയാണ് ദീന വിജയം പിടിച്ചെടുത്തത്. ഞായറാഴ്ച നടന്ന വെങ്കല മെഡൽ പോരാട്ടത്തിൽ നേപ്പാളിന്റെ അരിക ഗുരുങ്ങിനെ 8–7 എന്ന സ്കോറിനാണ് സൗദി താരം കീഴടക്കിയത്. മത്സരത്തിന്റെ തുടക്കത്തിൽ 3–0 എന്ന സ്കോറിന് പിന്നിലായിരുന്ന ദീന, അവസാന നിമിഷങ്ങളിൽ കാണിച്ച പൊരുതാനുള്ള വീര്യത്തിലൂടെയാണ് മെഡൽ ഉറപ്പാക്കിയത്. കൂടാതെ, പുരുഷൻമാരുടെ 60 കിലോഗ്രാം കരാട്ടെ വിഭാഗത്തിലും സൗദിയുടെ സൗദ് അൽ-ബഷീർ വെങ്കലം നേടി. നേപ്പാളിന്റെ താമാങ്ങിനെ 2–0 എന്ന സ്കോറിന് തോൽപ്പിച്ചാണ് സൗദ് മെഡൽ പട്ടികയിൽ ഇടംപിടിച്ചത്.
സൗദി അറേബ്യയിലെ വനിതാ കായികരംഗത്തെ പുതിയ കുതിപ്പിന്റെയും വളർച്ചയുടെയും പ്രതീകമായാണ് ദീന മുസ്തഫയുടെ ഈ നേട്ടം വിലയിരുത്തപ്പെടുന്നത്. കിരീടാവകാശി മുഹമ്മദ് ബിൻ സൽമാന്റെ വിഷൻ 2030 (Vision 2030) പദ്ധതിയുടെ ഭാഗമായി രാജ്യത്ത് സ്ത്രീകളുടെ തൊഴിൽ, കായികം, പൊതുജീവിതം എന്നിവയിലെ പങ്കാളിത്തം വർദ്ധിപ്പിക്കുന്നതിന് വിപുലമായ പരിഷ്കാരങ്ങളാണ് നടപ്പിലാക്കിവരുന്നത്. സ്ത്രീകൾക്ക് ഡ്രൈവിങ് അനുമതി നൽകിയതും സ്റ്റേഡിയങ്ങളിലേക്ക് പ്രവേശനം ലഭിച്ചതും ഉൾപ്പെടെയുള്ള ചരിത്രപരമായ മാറ്റങ്ങളുടെ തുടർച്ചയായാണ് അന്താരാഷ്ട്ര കായിക വേദിയിലെ ഈ മെഡൽ തിളക്കം.
