കുറ്റ്യാടി: ബന്ധുവീട്ടിൽ വിരുന്നെത്തിയ പെൺകുട്ടി കുറ്റ്യാടി പുഴയിൽ മുങ്ങിമരിച്ചു. നാദാപുരം സ്വദേശിനി നജ (17) ആണ് മരിച്ചത്. ശനിയാഴ്ച രാവിലെ 11 മണിയോടെ കുറ്റ്യാടി മണ്ണൂർ ഭാഗത്തായിരുന്നു ദാരുണമായ ഈ അപകടം നടന്നത്. മണ്ണൂരിലെ ബന്ധുവീട്ടിലെത്തിയ നജ സുഹൃത്തുക്കൾക്കൊപ്പം പുഴയിൽ കുളിക്കാനിറങ്ങിയതായിരുന്നു. കുളിക്കുന്നതിനിടെ പെൺകുട്ടി അപ്രതീക്ഷിതമായി ശക്തമായ ഒഴുക്കിൽപ്പെടുകയായിരുന്നു.
കൂടെയുണ്ടായിരുന്നവരുടെ നിലവിളി കേട്ട് ഓടിയെത്തിയ നാട്ടുകാർ ഉടൻ തന്നെ പുഴയിൽ തിരച്ചിൽ നടത്തി നജയെ കരയ്ക്കെത്തിച്ചു. ഉടൻ തന്നെ കുറ്റ്യാടിയിലെ സ്വകാര്യ ആശുപത്രിയിലും തുടർന്ന് താലൂക്ക് ആശുപത്രിയിലും എത്തിച്ചെങ്കിലും ജീവൻ രക്ഷിക്കാനായില്ല. നിലവിൽ മൃതദേഹം കുറ്റ്യാടി താലൂക്ക് ആശുപത്രി മോർച്ചറിയിൽ സൂക്ഷിച്ചിരിക്കുകയാണ്. നിയമനടപടികൾ പൂർത്തിയാക്കിയ ശേഷം മൃതദേഹം ബന്ധുക്കൾക്ക് വിട്ടുകൊടുക്കും. അവധിക്കാലം ആഘോഷിക്കാൻ ബന്ധുവീട്ടിലെത്തിയ പെൺകുട്ടിയുടെ മരണം നാടിനെയാകെ ദുഃഖത്തിലാഴ്ത്തി..
