ഇസ്ലാമാബാദ്: ഇറാനും അമേരിക്കയും തമ്മിലുള്ള യുദ്ധം അവസാനിപ്പിക്കാനുള്ള സമാധാന ചർച്ചകൾ പുനരാരംഭിക്കുന്നതിന്റെ ഭാഗമായി ഇറാൻ വിദേശകാര്യമന്ത്രി അബ്ബാസ് അരാഗ്ചി ഇസ്ലാമാബാദ് സന്ദർശിക്കുന്നു. പശ്ചിമേഷ്യയിൽ നിലനിൽക്കുന്ന കടുത്ത സംഘർഷാവസ്ഥയ്ക്കും നയതന്ത്ര സ്തംഭനാവസ്ഥയ്ക്കും പരിഹാരം കാണാനുള്ള ശ്രമങ്ങളുടെ ഭാഗമായാണ് ഈ സന്ദർശനമെന്ന് അൽ ജസീറ റിപ്പോർട്ട് ചെയ്യുന്നു. ഇസ്ലാമാബാദിൽ പാകിസ്ഥാൻ അധികൃതരുമായി നടത്തുന്ന കൂടിക്കാഴ്ചയിൽ ഉഭയകക്ഷി ബന്ധങ്ങൾക്കൊപ്പം പ്രാദേശിക സുരക്ഷാ പ്രശ്നങ്ങളും ചർച്ചയാകും. അമേരിക്കയുമായുള്ള ചർച്ചകൾക്ക് പാകിസ്ഥാൻ വേദിയായേക്കുമെന്ന സൂചനകൾ നിലനിൽക്കുന്നുണ്ടെങ്കിലും, ഇറാൻ്റെ തുറമുഖങ്ങൾക്ക് മേൽ ഏർപ്പെടുത്തിയിരിക്കുന്ന നാവിക ഉപരോധം പിൻവലിക്കാതെ ഔദ്യോഗിക ചർച്ചകൾക്ക് തയ്യാറല്ലെന്ന ഉറച്ച നിലപാടിലാണ് ടെഹ്റാൻ.
ഇറാൻ്റെ പുതിയ പത്തു നിർദ്ദേശങ്ങളിൽ ഏറ്റവും പ്രധാനമായത് ഉപരോധം പൂർണ്ണമായും പിൻവലിക്കുക എന്നതാണെന്ന് അരാഗ്ചി ആവർത്തിച്ചു. സന്ദർശന വേളയിൽ റഷ്യ, ഒമാൻ തുടങ്ങിയ രാജ്യങ്ങളുടെ മധ്യസ്ഥതയിലുള്ള പുതിയ സമാധാന ഫോർമുലകളും ചർച്ചാവിഷയമാകും. ഐക്യരാഷ്ട്രസഭയുടെ സുരക്ഷാ സമിതിയിൽ നിന്നുള്ള ഉറപ്പും ഭാവിയിൽ തങ്ങൾക്കെതിരെ ആക്രമണം ഉണ്ടാകില്ലെന്ന ഗ്യാരണ്ടിയും ഇറാൻ ആവശ്യപ്പെടുന്നുണ്ട്. അമേരിക്കൻ പ്രസിഡന്റ് ഡൊണാൾഡ് ട്രംപ് വെടിനിർത്തൽ നീട്ടിയിട്ടുണ്ടെങ്കിലും സമുദ്രപാതയിലെ ഉപരോധവും കപ്പലുകൾ പിടിച്ചെടുക്കുന്നതുമായി ബന്ധപ്പെട്ട തർക്കങ്ങളും സമാധാന ചർച്ചകളെ പ്രതിസന്ധിയിലാക്കുന്നു. പാകിസ്ഥാൻ നടത്തുന്ന ഈ മധ്യസ്ഥ ശ്രമങ്ങൾ വിജയിച്ചാൽ മാത്രമേ മേഖലയിലെ സാമ്പത്തിക അനിശ്ചിതത്വത്തിനും ആഗോള വിപണിയിലെ എണ്ണവില വർധനവിനും പരിഹാരമാകൂ എന്നാണ് രാഷ്ട്രീയ നിരീക്ഷകരുടെ വിലയിരുത്തൽ.
