ന്യൂഡൽഹി: ദേശീയ വിദ്യാഭ്യാസ നയം, നാഷണൽ കരിക്കുലം ഫ്രെയിംവർക്ക് എന്നിവയുടെ ശുപാർശകൾ നടപ്പിലാക്കുന്നതിന്റെ ഭാഗമായി സി.ബി.എസ്.ഇ ഒമ്പതാം ക്ലാസ് പാഠ്യപദ്ധതിയിൽ സുപ്രധാന മാറ്റങ്ങൾ പ്രഖ്യാപിച്ചു. 2026-27 അധ്യയന വർഷം മുതൽ ഗണിതം, സയൻസ് വിഷയങ്ങളിൽ സാധാരണ നിലവാരത്തിലുള്ള കോഴ്സുകൾക്ക് പുറമെ ‘ഓപ്ഷണൽ അഡ്വാൻസ്ഡ് ലെവൽ’ കോഴ്സുകൾ കൂടി ബോർഡ് അവതരിപ്പിച്ചു.
വിദ്യാർത്ഥികൾക്കിടയിലെ വ്യത്യസ്തമായ പഠന അഭിരുചികളെ പ്രോത്സാഹിപ്പിക്കാനും ഉന്നത വിദ്യാഭ്യാസത്തിന് താല്പര്യമുള്ളവർക്ക് മികച്ച അടിത്തറ പാകാനുമാണ് ഈ നീക്കം. പുതിയ ക്രമീകരണമനുസരിച്ച് എല്ലാ വിദ്യാർത്ഥികൾക്കും സാധാരണ നിലവാരത്തിലുള്ള പാഠഭാഗങ്ങൾ നിർബന്ധമായിരിക്കും. എന്നാൽ ഗണിതത്തിലോ സയൻസിലോ കൂടുതൽ ആഴത്തിലുള്ള പഠനം ആഗ്രഹിക്കുന്നവർക്ക് അത്തരം വിഷയങ്ങളിൽ അഡ്വാൻസ്ഡ് ലെവൽ തിരഞ്ഞെടുക്കാം. പ്രധാനമായും ജെ.ഇ.ഇ , നീറ്റ് പോലുള്ള മത്സര പരീക്ഷകൾക്ക് തയ്യാറെടുക്കുന്ന വിദ്യാർത്ഥികൾക്ക് ഏറെ ഗുണകരമാകുന്ന രീതിയിലാണ് അഡ്വാൻസ്ഡ് പാഠ്യപദ്ധതി രൂപകൽപ്പന ചെയ്തിരിക്കുന്നത്.
പുതിയ അഡ്വാൻസ്ഡ് സയൻസ് കോഴ്സിന്റെ പൂർണ്ണരൂപവും അഡ്വാൻസ്ഡ് ഗണിതത്തിന്റെ ആദ്യ രണ്ട് അധ്യായങ്ങളും സി.ബി.എസ്.ഇ ഔദ്യോഗിക വെബ്സൈറ്റിൽ പ്രസിദ്ധീകരിച്ചിട്ടുണ്ട്. ഗണിതത്തിലെ ബാക്കി നാല് അധ്യായങ്ങൾ ഉടൻ തന്നെ ലഭ്യമാക്കുമെന്ന് അധികൃതർ അറിയിച്ചു.
പുതിയ മാറ്റങ്ങൾ പ്രകാരം നിലവിൽ ഒമ്പതാം ക്ലാസിൽ പഠിക്കുന്ന വിദ്യാർത്ഥികൾക്ക് പുതിയ രീതിയിലുള്ള പത്താം ക്ലാസ് ബോർഡ് പരീക്ഷ 2028-ൽ എഴുതാൻ സാധിക്കും. ഗണിതത്തിനും സയൻസിനും പുറമെ ഭാഷാ പഠനത്തിലും തൊഴിലധിഷ്ഠിത വിദ്യാഭ്യാസത്തിലും സി.ബി.എസ്.ഇ മാറ്റങ്ങൾ കൊണ്ടുവരുന്നുണ്ട്. ഇതിന്റെ ഭാഗമായി ആറാം ക്ലാസ് മുതൽ മൂന്ന് ഭാഷകൾ നിർബന്ധമാക്കുന്ന രീതിയും നടപ്പിലാക്കാൻ ബോർഡ് ലക്ഷ്യമിടുന്നു.
പുതിയ മാറ്റങ്ങളെക്കുറിച്ചുള്ള കൂടുതൽ വിവരങ്ങൾക്കും പഠന സാമഗ്രികൾക്കുമായി സി.ബി.എസ്.ഇയുടെ ഔദ്യോഗിക വെബ്സൈറ്റ് സന്ദർശിക്കുക.
