മക്ക: ഇസ്ലാമിക കലണ്ടറിലെ പുതിയ വർഷാരംഭമായ മുഹറം ഒന്നിന്റെ പുലരിയിൽ വിശുദ്ധ കഅബാലയത്തിൽ പുതിയ പുതപ്പ് (കിസ്വ) അണിയിക്കുന്നതിനുള്ള എല്ലാവിധ ഒരുക്കങ്ങളും പൂർത്തിയായതായി അധികൃതർ അറിയിച്ചു. കഅബയുടെ ചരിത്രത്തിലും മുസ്ലിം സമൂഹത്തിൻറെ ഹൃദയങ്ങളിലും ഏറെ സവിശേഷവും ആദരവ നിറഞ്ഞതുമായ ഈ വാർഷിക ചടങ്ങുകൾക്കായുള്ള അവസാനഘട്ട പരിശോധനകൾ മക്കയിലെ കിങ് അബ്ദുൽ അസീസ് കോംപ്ലക്സ് ഫോർ ദ ഹോളി കഅബ കിസ്വയിൽ പൂർത്തിയായി കഴിഞ്ഞു. പരമ്പരാഗതമായി തുടർന്നുപോരുന്ന കൃത്യമായ സുരക്ഷാ-സാങ്കേതിക മാനദണ്ഡങ്ങൾ പാലിച്ചാണ് കഅബയുടെ പുതിയ ഗിലാഫ് മാറ്റുന്ന പ്രക്രിയകൾ നടക്കുക.
ഏകദേശം 11 മാസക്കാലത്തെ കഠിനമായ അധ്വാനത്തിലൂടെ നൂറിലധികം വിദഗ്ദ്ധരായ സൗദി തൊഴിലാളികളും ഡിസൈനർമാരും ചേർന്നാണ് അതിമനോഹരമായ പുതിയ കിസ്വ നെയ്തെടുത്തിട്ടുള്ളത്. പ്രകൃതിദത്തമായ ശുദ്ധമായ പട്ടുനൂൽ കറുത്ത ചായം മുക്കി നെയ്തെടുത്താണ് കിസ്വയുടെ പ്രധാന ഭാഗങ്ങൾ നിർമ്മിക്കുന്നത്. ഇതിന് മുകളിലായി കഅബയുടെ ബെൽറ്റ് ഉൾപ്പെടെയുള്ള ഭാഗങ്ങളിൽ പരിശുദ്ധ ഖുർആൻ സൂക്തങ്ങളും ഇസ്ലാമിക കാലിഗ്രാഫികളും 24 കാരറ്റ് സ്വർണ്ണവും വെള്ളിയും പൂശിയ പ്രത്യേക നൂലുകൾ ഉപയോഗിച്ച് അതീവ കൈവിരുതോടെ തുന്നിപ്പിടിപ്പിച്ചിരിക്കുന്നു. കഅബയുടെ നാല് വശങ്ങളും വാതിലിന്റെ വിരിയും ഉൾപ്പെടെ പ്രത്യേക ഭാഗങ്ങളായാണ് ഇത് തയ്യാറാക്കിയിരിക്കുന്നത്.
മുഹറം ഒന്നിന്റെ പുലർച്ചയോടെ എൻജിനീയർമാരും സാങ്കേതിക വിദഗ്ദ്ധരും അടങ്ങുന്ന വൻ സംഘത്തിന്റെ നേതൃത്വത്തിൽ പുതിയ കിസ്വ കഅബയുടെ മുകളിലേക്ക് ഉയർത്തും. നിലവിലുള്ള പഴയ പുതപ്പ് ഓരോ വശങ്ങളിൽ നിന്നും മാറ്റി പകരം പുതിയത് ഘടിപ്പിക്കുന്ന അതീവ ജാഗ്രതയോടെയുള്ള പ്രക്രിയയാണ് ഏതാനും മണിക്കൂറുകൾ കൊണ്ട് ഇവിടെ പൂർത്തിയാവുക. ഇസ്ലാമിക പൈതൃകം വിളിച്ചോതുന്ന ഈ പുണ്യകർമ്മം വരും തലമുറകൾക്കായി ഏറ്റവും ഉദാത്തമായ രീതിയിൽ നിലനിർത്താൻ സൗദി ഭരണകൂടം വലിയ പ്രാധാന്യമാണ് നൽകി വരുന്നത്. വിശുദ്ധ കഅബ പുതിയ പുടവ അണിയുന്ന ഭക്തിനിർഭരമായ ആ പുണ്യനിമിഷത്തിന് സാക്ഷ്യം വഹിക്കാൻ മക്കയിലെ മസ്ജിദുൽ ഹറാമിൽ വൻ തോതിൽ തീർത്ഥാടകരും ഒത്തുകൂടും.
