ന്യൂഡൽഹി: ‘ജെൻ സി’ തലമുറയിൽപ്പെട്ട പുതിയ വോട്ടർമാരുടെ രാഷ്ട്രീയ ബോധത്തെയും ചോദ്യം ചെയ്യാനുള്ള ശേഷിയെയും പ്രധാനമന്ത്രി നരേന്ദ്ര മോദി ഭയക്കുന്നുവെന്ന് കോൺഗ്രസ്. വോട്ടർപട്ടിക പ്രത്യേക തീവ്ര പരിഷ്കരണത്തിന് (SIR) പിന്നാലെ വാർഷിക സംക്ഷിപ്ത പുതുക്കൽ (SSR) നടപടികൾ മരവിപ്പിച്ച് പുതിയ യുവ വോട്ടർമാരെ ഒഴിവാക്കാൻ ശ്രമിക്കുകയാണെന്നും, കുറ്റപത്രങ്ങളിലൂടെയും (FIR) മറ്റ് വിചിത്രമായ ഉപാധികളിലൂടെയും യുവാക്കളുടെ വോട്ടവകാശം അട്ടിമറിക്കുകയാണെന്നും കോൺഗ്രസ് രൂക്ഷമായി വിമർശിച്ചു.
മുൻ പ്രധാനമന്ത്രി രാജീവ് ഗാന്ധി 1988-ൽ 61-ാം ഭരണഘടനാ ഭേദഗതിയിലൂടെ വോട്ടെടുപ്പ് പ്രായം 21-ൽ നിന്ന് 18 ആയി കുറച്ച് രാജ്യത്തെ യുവാക്കളെ ശാക്തീകരിച്ചുവെങ്കിൽ, ഇന്നത്തെ മോദി സർക്കാർ അവരെ ഭയപ്പെടുകയും വോട്ടർപട്ടികയിൽ നിന്ന് ബോധപൂർവ്വം പുറത്താക്കാൻ ശ്രമിക്കുകയുമാണെന്ന് കോൺഗ്രസ് ജനറൽ സെക്രട്ടറി ജയ്റാം രമേശ് കുറ്റപ്പെടുത്തി. തെരഞ്ഞെടുപ്പ് കമ്മീഷനിൽ ചീഫ് ഇലക്ഷൻ കമ്മീഷണർ ഗ്യാനേഷ് കുമാറും മറ്റ് ഇലക്ഷൻ കമ്മീഷണർമാരും തമ്മിൽ വോട്ടർപട്ടിക പുതുക്കൽ വൈകുന്നതിനെച്ചൊല്ലിയും ഫോം-6 അപേക്ഷകൾ നിരസിക്കുന്നതിനെച്ചൊല്ലിയും അഭിപ്രായവ്യത്യാസങ്ങൾ നിലനിൽക്കുന്നുണ്ടെന്ന റിപ്പോർട്ടുകൾ പുറത്തുവന്ന പശ്ചാത്തലത്തിലാണ് കോൺഗ്രസിന്റെ കടുത്ത പ്രതികരണം.
വരാനിരിക്കുന്ന ഉത്തർപ്രദേശ്, ഗോവ നിയമസഭാ തെരഞ്ഞെടുപ്പുകൾക്ക് മുന്നോടിയായി പുതിയ വോട്ടർമാർ പട്ടികയിൽ ഉൾപ്പെടുന്നത് തടയാൻ കേന്ദ്ര ഭരണകൂടം ഗൂഢാലോചന നടത്തുകയാണെന്നും അദ്ദേഹം ആരോപിച്ചു. ചോദ്യങ്ങൾ ചോദിക്കുന്ന യുവാക്കളെയും വിദ്യാർത്ഥികളെയും ഭരണകൂടം ഭീഷണിപ്പെടുത്താനും അടിച്ചമർത്താനുമാണ് ശ്രമിക്കുന്നത്. കേന്ദ്ര സർക്കാരിന്റെയും തെരഞ്ഞെടുപ്പ് കമ്മീഷന്റെയും ഇത്തരം സ്വേച്ഛാധിപത്യ നടപടികൾക്കെതിരെ പ്രതിപക്ഷം പാർലമെന്റിലും തെരുവിലും പ്രക്ഷോഭം ശക്തമാക്കുമെന്നും നേതാക്കൾ വ്യക്തമാക്കി.
