ടെഹ്റാൻ: തങ്ങളുടെ അനുമതിയില്ലാതെ സഞ്ചരിച്ച നാല് എണ്ണക്കപ്പലുകൾക്ക് (ടാങ്കറുകൾ) ഹോർമുസ് കടലിടുക്കിൽ തീപിടിച്ചതായി ഇറാൻ സായുധ സേന വ്യാഴാഴ്ച അറിയിച്ചു. ഫെബ്രുവരി അവസാനത്തോടെ പശ്ചിമേഷ്യയിൽ യുദ്ധം പൊട്ടിപ്പുറപ്പെട്ടതിനു പിന്നാലെ, തന്ത്രപ്രധാനമായ ഈ കപ്പൽപ്പാതയിലൂടെയുള്ള ഗതാഗതത്തിന് ഇറാൻ കടുത്ത നിയന്ത്രണങ്ങൾ ഏർപ്പെടുത്തുകയും തങ്ങൾ അംഗീകരിച്ച പാതകൾ മാത്രമേ ഉപയോഗിക്കാവൂ എന്ന് കർശന നിർദ്ദേശം നൽകുകയും ചെയ്തിരുന്നു. ഇതിന് മറുപടിയായി അമേരിക്ക ഇറാൻ തുറമുഖങ്ങൾക്ക് നാവിക ഉപരോധം ഏർപ്പെടുത്തുകയും, ആഗോള എണ്ണ വിതരണത്തിന്റെ അഞ്ചിലൊന്ന് കടന്നുപോകുന്ന ഈ കടലിടുക്കിലൂടെ ടാങ്കറുകൾക്ക് സുരക്ഷിതമായി കടന്നുപോകാൻ സഹായം നൽകുകയും ചെയ്തുവരികയാണ്.
റെവല്യൂഷണറി ഗാർഡ്‌സ് നാവികസേനയുടെ ആവർത്തിച്ചുള്ള മുന്നറിയിപ്പുകൾ അവഗണിച്ച്, അപകടകരവും അനധികൃതവുമായ തെക്കൻ സമുദ്രപാതയിലൂടെ നിയമം ലംഘിച്ച് സഞ്ചരിച്ച രണ്ട് ടാങ്കറുകളാണ് കഴിഞ്ഞ രാത്രി അപകടത്തിൽപ്പെട്ടതെന്ന് ഐ.ആർ.ജി.സി പ്രസ്താവനയിൽ വ്യക്തമാക്കി. അപകടത്തിന്റെ കൃത്യമായ സ്വഭാവം വ്യക്തമാക്കിയില്ലെങ്കിലും, ശക്തമായ സ്ഫോടനത്തെത്തുടർന്ന് രണ്ട് കപ്പലുകളുടെയും ചലനശേഷി നഷ്ടപ്പെട്ടതായി സൈന്യം അറിയിച്ചു. ആകെ 40 ലക്ഷത്തിലധികം ബാരൽ എണ്ണ വഹിച്ചിരുന്ന ഈ രണ്ട് ഭീമൻ ടാങ്കറുകൾ ഇപ്പോൾ കത്തിയെരിയുകയാണെന്നും, അമേരിക്കൻ സൈന്യത്തിൽ അന്ധമായി വിശ്വാസമർപ്പിച്ചതിന്റെ ഫലമാണിതെന്നും പ്രസ്താവനയിൽ കുറ്റപ്പെടുത്തി.
ഇതിന് പിന്നാലെ വ്യാഴാഴ്ച ഉച്ചയ്ക്ക് ശേഷം, കടലിടുക്കിന്റെ കിഴക്ക് ഭാഗത്ത് നിയമലംഘനം നടത്തി പ്രവേശിച്ച മറ്റ് രണ്ട് ടാങ്കറുകൾ നാവിക മൈനുകളിൽ തട്ടി തീപിടിച്ചതായി ഇറാൻ കരസേനയും സ്റ്റേറ്റ് ടെലിവിഷൻ വഴി പുറത്തുവിട്ട പ്രസ്താവനയിൽ അറിയിച്ചു. തീപിടിച്ച കപ്പലുകളുടെ പേരോ അവ ഏത് രാജ്യത്തിന്റേതാണെന്നോ സൈന്യം വെളിപ്പെടുത്തിയിട്ടില്ല. നിരോധിത മേഖലകളിലൂടെ കടന്നുപോകാൻ ശ്രമിക്കുന്ന കപ്പലുകൾക്ക് തീപിടിക്കുന്നതായി സമീപ ആഴ്ചകളിൽ ഇറാൻ സൈന്യം പലതവണ പ്രഖ്യാപനങ്ങൾ നടത്തിയിട്ടുണ്ട്. കപ്പലുകൾ മൈനുകളിൽ തട്ടിയാണ് അപകടമുണ്ടാകുന്നതെന്നാണ് ഇറാന്റെ വാദമെങ്കിലും, ഹോർമുസ് കടലിടുക്കിൽ നിന്ന് എല്ലാ മൈനുകളും നീക്കം ചെയ്തതായാണ് അമേരിക്കൻ സൈന്യം അടുത്തിടെ അവകാശപ്പെട്ടത്.
