ആലപ്പുഴ: സംസ്ഥാനത്ത് ദേശീയ ആരോഗ്യ ദൗത്യത്തിന് (എൻ.എച്ച്.എം) കീഴിൽ ജോലിചെയ്യുന്ന കരാർ ജീവനക്കാർക്ക് നേരെ കൂട്ട പിരിച്ചുവിടൽ നടപടിയുമായി ആരോഗ്യവകുപ്പ്. ഇതിന്റെ ഭാഗമായി സംസ്ഥാനത്തൊട്ടാകെ 1,495 ജീവനക്കാരെയാണ് സേവനത്തിൽ നിന്നും ഒഴിവാക്കിയത്. ആലപ്പുഴ ജില്ലയിൽ മാത്രം മെഡിക്കൽ ഓഫീസർമാർ, പി.ആർ.ഒമാർ, നഴ്‌സുമാർ, ക്ലറിക്കൽ ജീവനക്കാർ ഉൾപ്പെടെ 90 പേർക്ക് ജോലി നഷ്ടമായി. ജീവനക്കാരുടെ മുൻകാല പ്രവർത്തന മികവ് വിലയിരുത്തി തയ്യാറാക്കിയ പ്രത്യേക റിപ്പോർട്ടിന്റെ അടിസ്ഥാനത്തിലാണ് നടപടി.
നേരത്തെ ഒരു വർഷമായിരുന്ന കരാർ കാലാവധി രണ്ടു മാസമാക്കി ചുരുക്കിക്കൊണ്ടാണ് പിരിച്ചുവിടലിലേക്ക് അധികൃതർ വഴിയൊരുക്കിയത്. ജോലിയിൽ മികവില്ലാത്തവർ, സാമ്പത്തിക ക്രമക്കേടുകളിൽ അന്വേഷണം നേരിട്ടവർ, ഭരണാനുകൂല ഇടതുപക്ഷ അനുഭാവികൾ എന്നിവരാണ് ഒഴിവാക്കപ്പെട്ടവരിൽ ഭൂരിഭാഗവുമെന്ന് ചൂണ്ടിക്കാണിക്കപ്പെടുന്നു. ആലപ്പുഴയിലെ സി.ഐ.ടി.യു യൂണിയൻ ജില്ലാ പ്രസിഡന്റിനെ നിലനിർത്തിയപ്പോൾ സെക്രട്ടറിയെ ജോലിയിൽ നിന്നും ഒഴിവാക്കി. പിരിച്ചുവിടൽ ഭയന്ന് നിരവധി പേർ സി.ഐ.ടി.യുവിൽ നിന്നും വലതുപക്ഷ യൂണിയനുകളിലേക്ക് മാറിയെങ്കിലും ഇവരിൽ പലർക്കും ജോലി നഷ്ടപ്പെട്ടിട്ടുണ്ട്.
പിരിച്ചുവിടപ്പെട്ടവരിൽ 40 മുതൽ 50 വയസ്സ് വരെ പ്രായമുള്ള, വർഷങ്ങളായി ഈ മേഖലയിൽ സേവനമനുഷ്ഠിക്കുന്ന മുതിർന്ന ജീവനക്കാരും ഉൾപ്പെടുന്നുണ്ട്. ഒഴിവാക്കപ്പെട്ടവർക്ക് നടപടിക്കെതിരെ അപ്പീൽ നൽകാൻ അവസരമൊരുക്കിയിട്ടുണ്ട്. നിലവിൽ സേവനത്തിൽ തുടരുന്നവർക്ക് 2027 മാർച്ച് വരെ കാലാവധി അനുവദിച്ചിട്ടുണ്ടെങ്കിലും, അതിനുശേഷം രണ്ടാം ഘട്ട മൂല്യനിർണയം നടത്തി കൂടുതൽ പിരിച്ചുവിടലുകൾ ഉണ്ടായേക്കുമെന്നാണ് സൂചന. അതേസമയം, സർക്കാരിന്റെ ഈ പ്രതികാര നടപടിക്കെതിരെ സി.ഐ.ടി.യു യൂണിയൻ ശക്തമായ പ്രതിഷേധവുമായി രംഗത്തെത്തിയിട്ടുണ്ട്.
