ടെഹ്റാൻ: ഹോർമുസ് കടലിടുക്കിന് മുകളിൽ വെച്ച് അമേരിക്കയുടെ ‘എം.ക്യു-1 പ്രിഡേറ്റർ’ (MQ-1 Predator) ഡ്രോൺ വെടിവെച്ചിട്ടതായി ഇറാൻ നാവികസേന അറിയിച്ചതായി ഇറാനിയൻ മാധ്യമങ്ങൾ റിപ്പോർട്ട് ചെയ്തു. തെക്കൻ ഇറാനിലെ ഹോർമുസ്ഗാൻ പ്രവിശ്യയിലുള്ള സിരിക് തീരത്തെ കുഹെസ്താക്ക് മേഖലയ്ക്ക് സമീപമാണ് ഡ്രോൺ തകർത്തതെന്ന് അർദ്ധ-ഔദ്യോഗിക വാർത്താ ഏജൻസിയായ ഇർന വ്യക്തമാക്കി. ഇറാന്റെ സംയോജിത വ്യോമപ്രതിരോധ ശൃംഖലയ്ക്ക് കീഴിൽ നാവികസേന പ്രവർത്തിപ്പിക്കുന്ന പുതിയ വ്യോമപ്രതിരോധ സംവിധാനം ഉപയോഗിച്ചാണ് ഡ്രോൺ കണ്ടെത്തി തകർത്തതെന്നാണ് റിപ്പോർട്ട്.
രാജ്യത്തിന്റെ പ്രാദേശിക അഖണ്ഡതയും സമുദ്രാതിർത്തികളും ദേശീയ താൽപ്പര്യങ്ങളും സംരക്ഷിക്കുന്നതിൽ ഒരു നിമിഷം പോലും മടിച്ചുനിൽക്കില്ലെന്ന് ഇറാൻ നാവികസേന പ്രസ്താവനയിൽ മുന്നറിയിപ്പ് നൽകി. തകർക്കപ്പെട്ട ഡ്രോണിന്റേതെന്ന പേരിൽ ഇർന പുറത്തുവിട്ട സ്ഥിരീകരിക്കാത്ത ചിത്രങ്ങളിൽ, സൈനിക ഉപകരണങ്ങളുടെ തകർന്ന ഭാഗങ്ങൾ കാണാനുണ്ട്. വ്യാഴാഴ്ച സിരിക്കിലെ ടെലികമ്മ്യൂണിക്കേഷൻ ടവറിന് നേരെയുണ്ടായ ആക്രമണത്തിന് തിരിച്ചടിയായി ബഹ്‌റൈനിലെ യു.എസ് റഡാർ സംവിധാനം ആക്രമിച്ചതായി ഇറാൻ അവകാശപ്പെട്ടതിന് തൊട്ടുപിന്നാലെയാണ് ഹോർമുസ് മേഖലയിൽ സംഘർഷം വീണ്ടും കടുപ്പിക്കുന്ന ഈ സംഭവം റിപ്പോർട്ട് ചെയ്യപ്പെട്ടിരിക്കുന്നത്. അതേസമയം, ഡ്രോൺ വെടിവെച്ചിട്ടെന്ന ഇറാന്റെ അവകാശവാദത്തോട് അമേരിക്കൻ സൈന്യം ഇതുവരെ ഔദ്യോഗികമായി പ്രതികരിച്ചിട്ടില്ല.
