ശ്രീനഗർ: ജമ്മു കശ്മീരിലെ നൗഗാം പോലീസ് സ്റ്റേഷനിൽ വെള്ളിയാഴ്ച രാത്രി പിടിച്ചെടുത്ത സ്ഫോടക വസ്തുക്കൾ പൊട്ടിത്തെറിച്ച സംഭവത്തിൽ മരണസംഖ്യ ഒൻപത് ആയി ഉയർന്നു. ഏകദേശം 30 പേർക്ക് പരിക്കേറ്റിട്ടുണ്ട്, ഇതിൽ പലരുടെയും നില ഗുരുതരമാണ്. ജമ്മു കശ്മീർ സ്റ്റേറ്റ് ഇൻവെസ്റ്റിഗേറ്റീവ് ഏജൻസി (എസ്.ഐ.എ.) ഉദ്യോഗസ്ഥർ, പോലീസ് ഉദ്യോഗസ്ഥർ, ഫോറൻസിക് ടീം എന്നിവർ പിടിച്ചെടുത്ത സ്ഫോടകവസ്തുക്കൾ പരിശോധിക്കുന്നതിനിടെയാണ് അപകടം സംഭവിച്ചത്.
ഡൽഹി ചെങ്കോട്ട സ്ഫോടനക്കേസിലെ പ്രതികളിൽ ഒരാളായ മുസമ്മിൽ ഷക്കീലിന്റെ ഹരിയാനയിലെ ഫരീദാബാദിലുള്ള വാടകവീട്ടിൽ നിന്ന് പിടിച്ചെടുത്ത 360 കിലോഗ്രാം അമോണിയം നൈട്രേറ്റ് ഉൾപ്പെടെയുള്ള സ്ഫോടകവസ്തുക്കളാണ് പൊട്ടിത്തെറിച്ചത്. സ്ഫോടനത്തിന്റെ തീവ്രതയിൽ പോലീസ് സ്റ്റേഷൻ കെട്ടിടത്തിന് സാരമായ കേടുപാടുകൾ സംഭവിക്കുകയും വാഹനങ്ങൾക്ക് തീപിടിക്കുകയും ചെയ്തു. 30 കിലോമീറ്റർ അകലെ വരെ സ്ഫോടനശബ്ദം കേട്ടു.
മജിസ്ട്രേറ്റിന്റെ സാന്നിധ്യത്തിൽ അമോണിയം നൈട്രേറ്റ് സീൽ ചെയ്യുന്നതിനിടെ തീപിടിച്ചതാകാമെന്നാണ് പ്രാഥമിക നിഗമനം. എങ്കിലും, പോലീസ് സ്റ്റേഷൻ വളപ്പിൽ നിർത്തിയിട്ടിരുന്ന ഒരു കാറിൽ ഐ.ഇ.ഡി. (IED) ഘടിപ്പിച്ചുള്ള അട്ടിമറി സാധ്യതയും പോലീസ് തള്ളിക്കളയുന്നില്ല. ഭീകര സംഘടനയായ ജെയ്ഷയുടെ നിഴൽ സംഘടനയായ പാകിസ്ഥാൻ അഫ്ഗാൻ ഫ്രണ്ട് ഫൗണ്ടേഷൻ (PAAFF) ആക്രമണത്തിന്റെ ഉത്തരവാദിത്തം ഏറ്റെടുത്തതായി സ്ഥിരീകരിക്കാത്ത റിപ്പോർട്ടുകളുണ്ട്.
