കെയ്റോ: ഈജിപ്ഷ്യൻ പ്രസിഡന്റ് അബ്ദുൽ ഫത്താഹ് അൽ സിസിയുമായുള്ള ഔദ്യോഗിക ചർച്ചകൾക്കായി സൗദി കിരീടാവകാശിയും പ്രധാനമന്ത്രിയുമായ അമീർ മുഹമ്മദ് ബിൻ സൽമാൻ ബിൻ അബ്ദുൽ അസീസ് അൽ സൗദ് കെയ്റോയിലെത്തി. ഈജിപ്ഷ്യൻ തലസ്ഥാനത്തെത്തിയ കിരീടാവകാശിയെ പ്രസിഡന്റ് അബ്ദുൽ ഫത്താഹ് അൽ സിസി നേരിട്ടെത്തി ഊഷ്മളമായി സ്വീകരിച്ചു.
സൗദിയും ഈജിപ്തും തമ്മിലുള്ള ഉഭയകക്ഷി ബന്ധം കൂടുതൽ ശക്തമാക്കുന്നതിനും മേഖലയിലെ നിലവിലെ രാഷ്ട്രീയ, സുരക്ഷാ സാഹചര്യങ്ങൾ വിലയിരുത്തുന്നതിനുമാണ് ഈ സന്ദർശനം. ഇരു രാജ്യങ്ങളും തമ്മിലുള്ള സാമ്പത്തിക, വ്യാപാര, നിക്ഷേപ പങ്കാളിത്തം വർധിപ്പിക്കുന്നതിനെക്കുറിച്ചും, പ്രത്യേകിച്ച് ചെങ്കടൽ തീരത്തെ സംയുക്ത പദ്ധതികളെക്കുറിച്ചും നേതാക്കൾ ചർച്ച ചെയ്യും.
മേഖലയിലെ സമാധാനത്തിനും സ്ഥിരതയ്ക്കും ഇരു രാജ്യങ്ങളും തമ്മിലുള്ള സഹകരണം അത്യന്താപേക്ഷിതമാണെന്ന് കൂടിക്കാഴ്ചയിൽ ഇരുനേതാക്കളും വ്യക്തമാക്കി. ഗാസ ഉൾപ്പെടെയുള്ള മിഡിൽ ഈസ്റ്റിലെ നിലവിലെ സംഘർഷങ്ങളും അന്താരാഷ്ട്ര വിഷയങ്ങളും കൂടിക്കാഴ്ചയിൽ പ്രധാന ചർച്ചാവിഷയമാകും. ഉന്നതതല സൗദി പ്രതിനിധി സംഘവും കിരീടാവകാശിയോടൊപ്പം ഈജിപ്തിലെത്തിയിട്ടുണ്ട്.
