മസ്കറ്റ്: ഒമാൻ തീരക്കടലിൽ വെച്ച് വൻ അപകടത്തിൽപ്പെട്ട ഇന്ത്യൻ ചരക്കുകപ്പലിലെ 14 ജീവനക്കാരെയും യു.എസ് നാവികസേന അത്ഭുതകരമായി രക്ഷപ്പെടുത്തി. കടലിലെ കടുത്ത പ്രതികൂല കാലാവസ്ഥയെയും ശക്തമായ തിരമാലകളെയും തുടർന്നാണ് ഇന്ത്യൻ ഉടമസ്ഥതയിലുള്ള കപ്പൽ ഒമാൻ തീരത്തിന് സമീപം വെച്ച് മുങ്ങാൻ തുടങ്ങിയത്. കപ്പൽ പൂർണ്ണമായും മുങ്ങുന്നതിന് തൊട്ടുമുൻപുള്ള നിർണ്ണായക നിമിഷങ്ങളിലാണ് മേഖലയിൽ പട്രോളിങ് നടത്തുകയായിരുന്ന യു.എസ് നാവികസേനയുടെ ഗൈഡഡ് മിസൈൽ ഡിസ്ട്രോയർ കപ്പലായ യു.എസ്.എസ് ലബൂൺ രക്ഷകരായി എത്തിയത്.
അപകടത്തിൽപ്പെട്ട ഇന്ത്യൻ ജീവനക്കാർ ജീവൻ രക്ഷിക്കാനായി കടലിലേക്ക് ചാടുകയും ലൈഫ് റാഫ്റ്റിൽ അഭയം തേടുകയുമായിരുന്നു. വിവരമറിഞ്ഞ് ഉടൻ തന്നെ യു.എസ് നാവികസേനയുടെ അത്യാധുനിക ഹെലികോപ്റ്ററുകളും ലൈഫ് ബോട്ടുകളും സ്ഥലത്തെത്തി. കടുത്ത വെല്ലുവിളികൾ നിറഞ്ഞ രക്ഷാപ്രവർത്തനത്തിനൊടുവിൽ കടലിൽ അകപ്പെട്ട 14 ഇന്ത്യൻ നാവികരെയും സുരക്ഷിതമായി അവർ തങ്ങളുടെ കപ്പലിലേക്ക് മാറ്റുകയായിരുന്നു. രക്ഷപെടുത്തിയ എല്ലാ ഇന്ത്യൻ ജീവനക്കാർക്കും യു.എസ് നാവികസേന അടിയന്തര വൈദ്യസഹായവും ഭക്ഷണവും വസ്ത്രങ്ങളും ലഭ്യമാക്കിയിട്ടുണ്ട്.
നിലവിൽ രക്ഷപെടുത്തപ്പെട്ട എല്ലാ ഇന്ത്യൻ നാവികരുടെയും ആരോഗ്യനില തൃപ്തികരമാണെന്നാണ് ലഭിക്കുന്ന ഔദ്യോഗിക വിവരം. ഇവരെ സുരക്ഷിത താവളത്തിൽ എത്തിച്ച ശേഷം എത്രയും വേഗം ഇന്ത്യയിലേക്ക് മടക്കി അയക്കാനുള്ള നിയമപരമായ നടപടിക്രമങ്ങൾ ഒമാനിലെ ഇന്ത്യൻ എംബസിയും യു.എസ് നാവികസേനാ അധികൃതരും ചേർന്ന് നടത്തിവരികയാണ്. കപ്പൽ പൂർണ്ണമായും കടലിൽ മുങ്ങിപ്പോയതായാണ് റിപ്പോർട്ടുകൾ. അന്താരാഷ്ട്ര സമുദ്രമേഖലയിലെ കൃത്യമായ സമയത്തുള്ള യു.എസ് നാവികസേനയുടെ ഈ ഇടപെടൽ വലിയൊരു ദുരന്തമാണ് ഒഴിവാക്കിയത്.
