ചേർത്തല: ചേർത്തല പള്ളിപ്പുറം ആറാം മൈൽ ഭാഗത്ത് ഓടിക്കൊണ്ടിരുന്ന ജീപ്പിന് പെട്ടെന്ന് തീപിടിച്ച് വൻ അപകടം. ഡ്രൈവർ സന്ദർഭോചിതമായി പുറത്തിറങ്ങിയതിനാൽ വൻ ദുരന്തം ഒഴിവാകുകയും ആർക്കും പരിക്കേൽക്കാതെ രക്ഷപ്പെടുകയും ചെയ്തു. മുഹമ്മ സ്വദേശി അനന്ത കിഷോറിന്റെ ഉടമസ്ഥതയിലുള്ള ജീപ്പാണ് അപകടത്തിൽപ്പെട്ട് പൂർണ്ണമായി കത്തിനശിച്ചത്.
ചൊവ്വാഴ്ച രാവിലെ 11 മണിയോടെയാണ് സംഭവം നടക്കുന്നത്. സ്വന്തം ജോലി ആവശ്യങ്ങൾക്കായി ചേർത്തല ഭാഗത്തേക്ക് വാഹനം ഓടിച്ചുപോകുകയായിരുന്നു അനന്ത കിഷോർ. യാത്രയ്ക്കിടയിൽ ആറാം മൈൽ ഭാഗത്തുവെച്ച് ജീപ്പിന്റെ ഡാഷ് ബോർഡിനും മുൻഭാഗത്തിനും ഉള്ളിൽ നിന്ന് പെട്ടെന്ന് പുകയും തീയുമുയരുന്നത് ഇദ്ദേഹത്തിന്റെ ശ്രദ്ധയിൽപ്പെട്ടു. അപകടം മനസ്സിലാക്കിയ ഉടൻ തന്നെ ഇദ്ദേഹം വാഹനം റോഡരികിലേക്ക് ഒതുക്കി നിർത്തി പുറത്തേക്കിറങ്ങുകയായിരുന്നു.
നോക്കിനിൽക്കെ തീ പടർന്നുപിടിക്കുകയും വാഹനത്തിന്റെ മുൻഭാഗം പൂർണ്ണമായും കത്തിനശിക്കുകയും ചെയ്തു. വിവരമറിയിച്ചതിനെ തുടർന്ന് ചേർത്തലയിൽ നിന്നും ഉടൻതന്നെ അഗ്നിശമന സേനാ വിഭാഗം സ്ഥലത്തെത്തിയാണ് തീ പൂർണ്ണമായും അണച്ചത്. ഷോർട്ട് സർക്യൂട്ടാണ് തീപിടിത്തത്തിന് കാരണമായതെന്നാണ് പ്രാഥമിക നിഗമനം.
