ന്യൂഡൽഹി: രാജ്യതലസ്ഥാനത്തെ ജന്തർ മന്തറിൽ നടന്ന ജനകീയ പ്രതിഷേധവുമായി ബന്ധപ്പെട്ട് അറസ്റ്റിലായി ജുഡീഷ്യൽ കസ്റ്റഡിയിൽ കഴിഞ്ഞിരുന്ന കോക്രോച്ച് ജനതാ പാർട്ടി സഹ കൺവീനർമാരായ സൗരവ് ദാസ്, അശുതോഷ് റാങ്ക എന്നിവർക്ക് ജാമ്യം അനുവദിച്ചു. ആറു ദിവസത്തെ കസ്റ്റഡി കാലാവധിക്ക് ശേഷമാണ് മന്ദിർ മാർഗ് സ്പെഷ്യൽ എക്സിക്യൂട്ടീവ് മജിസ്ട്രേറ്റ് ഇരുവരും സമർപ്പിച്ച ജാമ്യാപേക്ഷ അംഗീകരിച്ച് ഉത്തരവിറക്കിയത്.
നേരത്തെ കസ്റ്റഡി കാലാവധി അവസാനിച്ചിരുന്നെങ്കിലും, ഭീഷണി സന്ദേശം ലഭിച്ചെന്ന കാരണം ചൂണ്ടിക്കാട്ടി വിഷയം പരിഗണിക്കാൻ സ്പെഷ്യൽ എക്സിക്യൂട്ടീവ് മജിസ്ട്രേറ്റ് വിസമ്മതിച്ചത് നാടകീയ രംഗങ്ങൾക്ക് വഴിവെച്ചിരുന്നു. രാവിലെ മുതൽ തങ്ങൾ മന്ദിർ മാർഗ് പോലീസ് സ്റ്റേഷനിൽ ഉണ്ടായിരുന്നുവെന്നും, ഉച്ചയ്ക്ക് 12 മണിക്ക് നടത്താനിരുന്ന വാദം കേൾക്കൽ വൈകിട്ട് അഞ്ചു മണി വരെ നീട്ടിക്കൊണ്ടുപോവുകയായിരുന്നുവെന്നും സി.ജെ.പി ലീഗൽ ഹെഡ് രത്ന സിങ് വ്യക്തമാക്കി. നടപടിക്രമങ്ങളെല്ലാം പൂർത്തിയായിട്ടും കേസ് പരിഗണിക്കുന്നത് വൈകിപ്പിച്ചതിൽ കടുത്ത അമർഷം ഉയർന്നിരുന്നു.
അതിനിടെ, മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് ഡൽഹിയിൽ പ്രതിപക്ഷ-യുവജന സംഘടനകളുടെ പ്രതിഷേധം കൂടുതൽ ശക്തിപ്പെടുകയാണ്. കോൺഗ്രസിന്റെ വിദ്യാർത്ഥി സംഘടനയായ എൻ.എസ്.യു.ഐ (NSUI) പ്രവർത്തകർ ജന്തർ മന്തറിലേക്ക് നടത്തിയ മാർച്ച് അശോകാ റോഡിൽ വെച്ച് പോലീസ് തടഞ്ഞു. വരും ദിവസങ്ങളിൽ പ്രതിഷേധം രാജ്യവ്യാപകമായി കടുപ്പിക്കാനാണ് യുവജന സംഘടനകളുടെ തീരുമാനം. ദസറ ആഘോഷങ്ങളോട് അനുബന്ധിച്ച് ഇടവേള നൽകിയിരുന്ന ഇൻഡ്യാ (INDIA) സഖ്യത്തിന്റെ പ്രതിഷേധങ്ങളും വരും ദിവസങ്ങളിൽ പുനരാരംഭിക്കും.
നവംബർ ഒന്നിന് രാംലീല മൈതാനത്ത് നടത്തുന്ന മഹാറാലിക്ക് മുന്നോടിയായി ശക്തമായ പ്രക്ഷോഭ പരിപാടികളാണ് പ്രതിപക്ഷം ആസൂത്രണം ചെയ്യുന്നത്. അതേസമയം, സി.ജെ.പി സംഘടിപ്പിച്ച തിരംഗ മാർച്ചിനെതിരെ ഡൽഹി പോലീസ് മൂന്ന് കേസുകൾ കൂടി രജിസ്റ്റർ ചെയ്തിട്ടുണ്ട്. അഭിജിത് ദിപ്കെ, നേഹ ബോറ, ആം ആദ്മി പാർട്ടി എന്നിവർക്കെതിരെയാണ് കേസ്. മാർച്ചിനിടെ വടികളും ആയുധങ്ങളുമായെത്തിയെന്ന ആരോപണത്തിൽ ഗാസിയാബാദ് സ്വദേശികളായ രണ്ടുപേരെ പോലീസ് അറസ്റ്റ് ചെയ്യുകയും ചെയ്തു.
